قصيدة ومجاراتها بـ الشيخ جار الله الجار الله

ارسل الي الشاعر ابراهيم بن صالح اللاحم ( ابو عمر ) القصيدة التالية

وهي تذكر بعض مواقف الشيخ جار الله بن سليمان الجارالله وفقه الله

وصدق المعاني التي وردت بالقصيدة جعلتني اجاريها

يقول ابو عمر :

يابيوت ياجـزلات هيضـي عليـه ابنضمك عقدٍ على صدر قرنـاس

اللي سمـا بافعـال بانـت جليـه ماهوب هيس ٍ مذهبه فعل الانجاس

يوم إن غيـره بالوجـاه ابدنيـه يسوق جاهه ما تتـرس بمتـراس

لا والله انـك للزعامـه حلـيـه ولا يستوي برذون مع قب الافراس

كم واحـدٍ فكيـت عنـه الاذيـه واصبح مع العالم بعـزٍ ونومـاس

جار الله اللي لـه يديـن ٍ نديـه ابن دخيل مطوع الصعب بالبـاس

يوم إن بعض الناس يشنا خويـه ولايقوم بالواجب و بالوجه عباس

وقد جاريت القصيدة بما يلي :

حييـت يـا راع البيـوت العذيـه يا مرحبا واعداد ما هـب نسنـاس

ابيوت شعـرٍ(ن) بالمعانـي نقيـه ابيوت شعر(ن) كنها نظم الالمـاس

ترحيبة(ن) من ظامري بـك وفيّـه ياللي تعد الطيب في طيب السـاس

راع الوفاء والطيـب راع الحميـه الدين نهجه والمراجـل لهـا راس

راس المراجـل والفعايـل سميـه تسمي وتبهج كل شهم من النـاس

هذاك ابو سليمـان زبـن الونيـه جارالله السليمان معدوم الاجنـاس

ابن دخيل سـاس الحـرار النديـه ماكر حـرار وللمشاكيـل نبـراس

بإدارة الاوقـاف مـا هـي خفيـه جهود(ن) لابوسليان جديدة ودراس

لخدمـة بيـوت الله نفسـه جريـه ويبذل جهود(ن) ما لها حد وقيـاس

في واجبـه دايـم اعزومـه قويـه بأمانة(ن) يعمـل ولا طـاع بـلاس

يالله يالمـعـبـود رب الـبـريـه تحفظه يا محصى عدد رمل الاطعاس

وتكفيه شر اهـل النوايـا الرديـه اللي هدفهم نفثـة السـم بالكـاس

ويابو عمـر منـي سـلام وتحيـه اعداد ما بانت نجوم(ن) بالادمـاس

للي يعـد الحـق بنفـس(ن) تقيـه ورايه سداد ولا يصيبـه تعومـاس

ويطالـع الواقـع بنظـرة ملـيـه محكم(ن) عقله عن الطيب ما جاس

وانته تعرف ان كـل نيـه مطيـه لا اقفت باهاليها مع الدرب مـراس

والناس بالنيـات مـا هـم سويـه والعقول تفرق لو تشابه بالالبـاس

والنفـوس فيهـن طيبـات زكيـه وفيهن خييثات(ن) تغذى بالادنـاس

وكل ظامي(ن) يشرع الى جاء مديه وطيب الثمر تلقاه في طيب الاغراس

وصـلاة رب البيـت علـى نبيـه اعداد ما خطت حروف(ن) بقرطاس

ولكم اطيب التحية