في 9 / 5 / 1447 هـ
قصيدة لقاء البدارين الثامن برعاية ابناء سليمان
العمر بسدير في 9/5/1447هـ
بديت بسم الله في قول ما كان
في ضامري من غاليات المضامين
تحية (ن) شذواه مسك(ن) وريحان
وعبيرها فـوح الزهــر بالبساتيـــن
لاولاد عامر بن زياد ابن بدران
نسل الضمين مرجحيــن الموازين
نسل الضمين مرجحة كل ميزان
له سمعة(ن) تعرف بكل الميادين
تحية(ن) نسوقها وسط قيفان
عنــد العمر يا مرحبا يالوفييــــن
يا مرحبا ترحيبة(ن) شانها شان
ياللي على الدعوة حضرتوا ملبين
جعل الوصل يبقى على مر الازمان
ومحبــة(ن) تدوم بيــن القريبيــــن
ترى التعارف شجرة(ن) ظلها زان
وزاهي ثمــرها ما يقــــدر بتثميــن
واللي غرس غرسه يجازيه باحسان
ربي على كل ما بذل قولوا اميــــن
بذل جهود(ن) وافية ابو سفيان
سعود ابن غــــزي كعام المعادين
بادر بفعل(ن) وافياً للملا بان
يوم انه
أسس ملتقى للبداريــــن
الشجرة اللي مورفة ظل واغصان
وبالوصل نسقيها من الحين للحين
عسى الوصل من بيننا دوم عنوان
حتى ثمرها ياخذ بــزود ويبيــــن
ويبقى على طول الزمن دون نقصان
متكاثر(ن) جنــاه في مقبــل سنين
والشكر والتقدير لابناء سليمان
ال العمر اعــداد ما شافــت العيــن
من الرحابة والتراحيب عرفان
في طيبهــم واكرامهــم للمجيبــيــن
بالبدرانية سلمهم سلم جدان
تــوارثــوه من الجــــدود المياميــــن
والقول عندي له دلايل وبرهان
وافعالهــم
بالطيــب خيــر البراهيــن
والله يديم الأمن في ظل سلمان
ويــديــم عــزه في بــلاد الحرميــن
مضرب مثل بالعز من بين الاوطان
بقيادة (ن)
عزمه على العز ما يلين
وتحفظ ولي العهد يا خير منـّان
اللي جعلهــا تــزود عز (ن)وتمكيــن
وصلوا على المختار من نسل عدنان
نبينا اللي وضــح الحــق والــــدين
اللهم صل وسلم على نبينا محمد وعلى اله وصحبه اجمعين
سليمان بن عبدالله المطرودي
ليست هناك تعليقات:
إرسال تعليق